✟✟ 𝟚𝟘𝟚𝟚 දෙසැම්බර් 3 ✟✟

 

පළමුවන කියවීම යෙසායා 30:19-21, 23-26

19ජෙරුසලමේ සිටින සෙනඟෙනි, ඔබ තවත් අඬන්නේ නැත. සමිඳාණන් වහන්සේ දයාන්විත ය. ඔබේ මොරගැසීමට උන් වහන්සේ සවන් දී ඔබට පිළිතුරු දෙන සේක. 20සමිඳාණන් වහන්සේ විපත නමැති කෑම ද, පීඩා නමැති වතුර ද ඔබට දෙන නමුත්, ඔබට උගන්වන පිණිස උන් වහන්සේ ම ඔබ සමඟ වැඩ සිටින සේක. උන් වහන්සේ සොයා යාමට ඔබට වුවමනාවක් ඇති නොවේ. 21ඔබ මාර්ගයෙන් දකුණට හෝ වමට හෝ හැරී නොමඟ යන විට, “මෙන්න හරි මාර්ගය, මෙහි ඇවිදින්නැ”යි කියන හඬක් ඔබට පිටුපසින් ඇසෙනු ඇත.

23ඔබ බීජ වැපුරූ කල ඒවා වැඩෙන පිණිස සමිඳාණන් වහන්සේ වර්ෂාව එවන සේක. උන් වහන්සේ ඔබට සාරවත් මහා අස්වැන්නක් දෙන සේක. ඔබේ ගවයන්ට ගොදුරු පිණිස විශාල තණ බිම් ඇති වන්නේ ය. 24බිම් හාන ගවයෝ ද කොටළුවෝ ද ඉතාමත් පෝෂ්‍යදායක ආහාර කන්නෝ ය. 25ඔබේ සතුරන්ගේ බලකොටු වැටී, සතුරන් මරාදමන දවසේ දී, පර්වත හා කඳු මුදුන්වලින් ජලධාරා ගලා එන්නේ ය. 26සමිඳාණන් වහන්සේ තමන් සෙනඟට පහර දීමෙන් ඇතිකළ තුවාළ බැඳ සුව කරන දවසේ දී හඳ එළිය ඉර එළිය මෙන් ද, ඉර එළිය සත් ගුණයකින් වැඩි වී සත් දවසක එළිය එක් වූවාක් මෙන් ද බැබළෙන්නේ ය.

පිළිතුරු ගීය ගීතාවලිය 147:1-2, 3-4, 5-6

පිළිතුර එතුමන් අදහන්නෝ භාග්‍යවන්තයෝ ය.

1සමිඳුන්ට ප්‍රශංසා කරන්න;

අපේ දෙවිඳුන්ට පසස් ගී ගැයීම යහපත් ය.

එතුමන් පැසසීම පියකරු ය, හොබනේ ය.

2සමිඳාණෝ ජෙරුසලම ගොඩනඟන සේක.

විප්‍රවාසී වූ ඉශ්රායෙල් සෙනඟ රැස් කරන සේක.

පිළිතුර එතුමන් අදහන්නෝ භාග්‍යවන්තයෝ ය.

3එතුමාණෝ බිඳුණු සිත් ඇත්තන් සුව කරන සේක;

ඔවුන්ගේ තුවාළ බඳින සේක.

4එතුමාණෝ තාරකා ගණන නියම කළ සේක.

ඒ සියල්ලට නම් තබන සේක.

පිළිතුර එතුමන් අදහන්නෝ භාග්‍යවන්තයෝ ය.

5අප සමිඳාණෝ උතුම් ය:

ඉතා බලසම්පන්න ය;

එතුමන්ගේ ඥානය අසීමිත ය.

6සමිඳාණෝ දීනයන් ඔසවන සේක;

දුදනන් පහතට හෙළන සේක.

පිළිතුර එතුමන් අදහන්නෝ භාග්‍යවන්තයෝ ය.

ආලේලූයියා යෙසායා 33:22

සමිඳාණෝ ම අප පාලනය කරන රජාණන් වන සේක;

අප විනිශ්චයකරුවාණන් වන සේක;

එතුමාණෝ අප පාලනයකර අප ආරක්ෂා කරන සේක.

සුබාරංචිය මතෙව්9:35-10:1, 5A, 6-8

35 ජේසුස් වහන්සේ ඔවුන්ගේ ධර්මශාලාවල උගන්වමින් ද, රාජ්‍යය පිළිබඳ සුබ අස්න දේශනා කරමින් ද, හැම අන්දමේ ලෙඩ රෝග සුව කරමින් ද සියලු නුවරවල හා ගම්වල සැරිසැරූ සේක.

36 ජේසුස් වහන්සේ ජනකාය දැක, ඔවුන් එඬේරෙකු නැති බැටළුවන් මෙන් දුක්ගැහැට විඳිමින් විසිර ගොස් සිටි බැවින් ඔවුන්ට අනුකම්පා කළ සේක. 37එවිට උන් වහන්සේ සිය ශ්‍රාවකයන්ට කතා කොට, “අස්වැන්න බහුල ය; ගොවීහු විරල ය. 38එහෙයින් අස්වැන්න කැපීමට ගොවීන් එවන ලෙස අස්වැන්න භාර හිමියා හට අයැදින්නැ”යි වදාළ සේක. 

1ජේසුස් වහන්සේ සිය ශ්‍රාවකයන් දොළොස් දෙනා තමන් වෙත කැඳවා, අශුද්ධාත්මයන් දුරු කරන පිණිස ද සියලු ආකාර ලෙඩ රෝග සුව කරන පිණිස ද ඔවුන්ට බලය පවරා දුන් සේක.

ජේසුස් වහන්සේ මෙකී දොළොස් දෙනා යවමින් ඔවුන්ට මෙසේ අණ දුන් සේක: 6ඉශ්රායෙල් වංශයේ නැති වූ බැටළුවන් වෙතට යන්න. 7එසේ ගොස්, ‘ස්වර්ග රාජ්‍යය ළං වී ඇතැ’යි දේශනා කරන්න. 8රෝගීන් සුව කරන්න, මළවුන් නැඟුටුවන්න, ලාදුරු රෝගීන් පවිත්‍ර කරන්න. දුෂ්ටාත්මයන් දුරු කරන්න. ඔබ නොමිලයේ ලැබුවහු ය, නොමිලයේ දෙන්න.