✟✟ 𝟚𝟘𝟚𝟚 දෙසැම්බර් 22 ✟✟

 පළමුවන කියවීම  1 සාමුවෙල් 1:24-28

24දරුවා කිරි වැරූ පසු, හන්නා තුන් අවුරුදු වස්සෙකු ද පිටි කිලෝග්‍රෑම් දහයක් ද මිදියුස බඳුනක් ද අරගෙන දරුවා ගෙන ගොස් ෂිලෝහි තිබුණු සමිඳාණන් වහන්සේගේ මාලිගාවට පැමුණුණා ය. එකල ඔහු කුඩා දරුවෙකු ව සිටියේ ය. 25ඔව්හු ගොන් වස්සා මරා දරුවා ඒලී ළඟට ගෙනාහ. 26ඈ ඒලී අමතා, “අනේ ස්වාමීනි, මට සමා වන්න. වරක් ඔබ ළඟ සමිඳාණන් වහන්සේට යාච්ඤා කරමින් සිටි ස්ත්‍රිය මා බව මම දිවුරා කියමි. 27මේ දරුවා දෙන ලෙස මම යාච්ඤා කෙළෙමි. සමිඳාණන් වහන්සේ ද මා උන් වහන්සේගෙන් ඉල්ලූ මේ ඉල්ලීම මට ඉටු කළ සේක. 28එබැවින් මම ද ඔහු සමිඳාණන් වහන්සේට දෙන්නෙමි. ඔහු ජීවත් ව සිටින තෙක් සමිඳාණන් වහන්සේට කැප ය”යි කීවා ය. ඔව්හු එහි දී සමිඳාණන් වහන්සේට නමස්කාර කළහ.

පිළිතුරු ගීය 1 සාමුවෙල් 2:1, 4-5, 6-7, 8ABCD

පිළිතුර“මා සිත සමිඳුන් කෙරෙහි ප්‍රීතිමත් වේ;

“මා සිත සමිඳුන් කෙරෙහි ප්‍රීතිමත් වේ;

මාගේ සවිය සමිඳුන් කෙරෙහි උසස් වී තිබේ.

මාගේ මුවින් මා සතුරන්ට මම සරදම් කරමි;

ඔබ මා ගැළෙවු නිසා මම ප්‍රීති වෙමි.

පිළිතුර“මා සිත සමිඳුන් කෙරෙහි ප්‍රීතිමත් වේ;

4බලවතුන්ගේ බලය දුබල වී ඇත.

දුබලයෝ බලවත් වී ඇත.

5කා බී තර වී සිටි අය කුලී වැඩ කරති;

සාගින්නෙන් පෙළී සිටි අයට සාගින්නක් තවත් නැත.

වඳ ස්ත්‍රියට දරුවන් සත්දෙනෙක් ඇත.

බොහෝ දරුවන් ලැබූ ස්ත්‍රියට දැන් එකෙක් වත් නැත.

පිළිතුර“මා සිත සමිඳුන් කෙරෙහි ප්‍රීතිමත් වේ;

6මරණය සමිඳුන්ගෙන් ය, ජීවිතය ද සමිඳුන්ගෙන් ය;

පාතාලයට ගෙන යන්නේත්, එයින් ගෙන එන්නේත් සමිඳාණෝ ය.

7සමිඳාණෝ දිළිඳුකම ද පොහොසත්කම ද ඇති කරන සේක;

පහත්කම ද උසස්කම ද ගෙන දෙන සේක.

පිළිතුර“මා සිත සමිඳුන් කෙරෙහි ප්‍රීතිමත් වේ;

8අධිපතීන් සමඟ හිඳුවන පිණිසත්, මහිමාසන උරුම කර දෙන පිණිසත්, එතුමාණෝ දුප්පතා ධූලියෙන් නැඟුටුවන සේක;

දිළින්දා කසළ ගොඩින් ඔසවන සේක.

පොළොවේ පදනම් සමිඳාණන්ගේ ය;

එතුමාණෝ ඒවා පිට ලොව පිහිටෙවු සේක.

පිළිතුර“මා සිත සමිඳුන් කෙරෙහි ප්‍රීතිමත් වේ;

සුබාරංචිය ලූක්   1:46-56

46  එවිට මරිය තුමී මෙ‍සේ උදන් ඇනුවා ය:

“මාගේ හද සමිඳුන් උසස් ලෙස පසසයි,

47මාගේ ආත්මය මා මිදුම්කාර දෙවිඳුන් ගැන උදන් අනයි;

48  මක්නිසා ද, එතුමාණෝ සිය දාසියගේ දීනතාව කුළුණු පාමින් සලකා වදාළ සේක.

හැම පරපුරක් ම මෙ‍තැන් සිට, භාග්‍යවන්තී ය’යි මට කියනු ඇත.

49පරාක්‍රමයාණෝ මා උදෙසා මහත් දේ කළ සේක.

‘පරිශුද්ධයාණෝ’ යනු එතුමන්ගේ නාමය ය.

50එතුමන්ගේ දයාව සිය බැතිමතුන් කෙරේ, පරපුරෙන් පරපුරට පැතිරේ.

51සිය බාහුවෙන් එතුමාණෝ විකුම් පා, උඩඟු උදම් සිතැත්තන් විසුරුවා හැර,

52  මහ නරපතීන් සිය සිහසුන්වලින් පහත හෙළා, දීනයන් ඉහළ නංවා උසස් කළ සේක.

53සාගිනි වූවන් යහපත් දෙයින් සතප්වා, ධනවතුන් හිස් අතින් හරවා යැවූ සේක.

54අප පියවරුන් වූ, ආබ්‍රහම්ට හා එම පරපුරට,

55  සදහට ම පොරොන්දු වූ දයාව සිහි කරමින් සිය සේවක ඉශ්රායෙල් සෙනඟ හට, පිහිට වූ සේක.”

56මරිය තුමී, එලිසබෙත් සමඟ තෙමසක් පමණ නැවතී සිට සිය නිවෙසට පෙරළා ගියා ය.