✟✟ 𝟚𝟘𝟚𝟚 දෙසැම්බර් 21 ✟✟

 

 පළමුවන කියවීම ප්‍රේම ගී  2:8-14 හෝ ශෙපනියා  3:14-18A

8අන්න, මා පෙම්වතාගේ කට හඬ;

කඳු මත පනිමින්, හෙල් පිට නඟිමින් බලන්න එන හැටි විගසින්.

9මා පෙම්වතා මුවෙකු වැනි ය.

ඔහු මුව පැටවෙකු වැනි ය;

බිත්තිය අයිනේ සිටගෙන, කවුළුව දෙස බලමින් ඔහු සිටියි, ගරාදි අතරෙන් එබිකම් කරමින්;

10මා පෙම්වතා මා අමතමින් මට මෙසේ කී ය:

“මා සුරතලිය, නැඟිටින්න;

මා සොඳුරිය, දැන් එන්න.

11සිසිර කාලය දැන් පසු වී ඇත;

වැසි වරුසා නතර වී ඇත.

12මිහි පිට මල් පිපී ඇත;

ගී ගයනා කාලය පැමිණ ඇත;

කොවුල් හඬ දසත පැතිර යත.

13පැසුණු දිඹුල් පල ඉදෙන විට, මිදිවැල් සුවඳ හමන විට, මා සුරතලිය, නැඟිට එන්න;

මා සොඳුරිය, දැන් එන්න.

14කඳු විවරවල, හෙල් කුහර තුළ මා පරෙවි දෙන, ඔබේ මුහුණ මට දකින්න දෙන්න;

ඔබේ කට හඬ මට ඇසෙන්නට දෙන්න;

ඔබේ කට හඬ මිහිරි ය;

ඔබේ මුහුණ සෝබන ය.”

ශෙපනියා  3:14-18A

14සියොන් පුරඟන, සොම්නසින් ගී ගයන්න;

ජෙරුසලම් වැසියෙනි, කෑමොරගසන්න;

ඉශ්රායෙල් ජනයෙනි, ප්‍රීති ප්‍රමෝද වන්න.

15සමිඳාණෝ ඔබට විරුද්ධ ව තිබුණු නඩු තීන්දු අවලංගු කළ සේක;

ඔබේ සතුරන් නෙරපාදැමූ සේක;

ඉශ්රායෙල්හි රජ වන සමිඳාණෝ ඔබ සමඟ සිටින සේක.

විපතට බිය වීමක් තවත් නැත.”

16එදින ජෙරුසලම මෙසේ කියනු ඇත.

“සියොන් නගරය, බිය නොවන්න;

ඔබ අත දුබල වන්නට ඉඩ නාරින්න.

17ඔබේ දෙවි සමිඳාණෝ ඔබ සමඟ ය;

ඔබට ජය අත් කර දෙන සෙබළාණෝ ය.

එතුමාණෝ ඔබ ගැන ප්‍රිය මනාප වන සේක;

සිය පෙමින් ඔබට නව ජීවනයක් දෙන සේක;

ඔබ ගැන සොම්නස් සිතින් ගී ගයන සේක;

18මංගල දවසක් මෙන් ප්‍රීති වන සේක;

පිළිතුරු ගීය ගීතාවලිය 33:2-3, 11-12, 20-21

පිළිතුර දමිටුනි, හිමි තුමන් කෙරේ ප්‍රීති සන්තෝෂ වන්න. එතුමන්ට නව ගීතයක් නඟන්න;

2වීණාව වයා හිමි තුමන් පසසන්න;

තත් දසයේ වීණාව ගෙන එතුමන්ට පැසසුම් ගීත ගයන්න.

3එතුමන්ට නව ගීතයක් නඟන්න;

මහ හඬකින් දක්ෂ ලෙස වාදනය කරන්න.

11එහෙත්, සමිඳුන්ගේ සැලසුම් සදහට ම ද එතුමන්ගේ සිතිවිලි පරපුරෙන් පරපුරට ද පවත්නේ ය.

12සමිඳුන් තමන් දෙවියන් කොට සලකන ජාතිය ද දෙවිඳුන් සතු උරුමය ලෙස තේරුණු සෙනඟ ද ආසිරි ලද්දෝ ය.

20අපි හිමි තුමන් කෙරේ විශ්වාසයෙන් බලා සිටියෙමු.

අපේ පිහිටත්, පලිහත් එතුමාණෝ ය.

21අපි එතුමන්ගේ සුවිශුද්ධනාමය කෙරේ විශ්වාසය තැබුවෙමු.

එබැවින් අපේ සිත් ප්‍රීතියෙන් පිනා යයි.

සුබාරංචිය ලූක්   1:39-45

39දින ගණනකට පසු මරිය තුමී නැඟිට ජුදා කඳුකරයෙහි නුවරකට යුහු ව ගොස්, 40සෙකරියස්ගේ ගෙට ඇතුළු වී, එලිසබෙත් හට ආචාර කළා ය. 41එලිසබෙත් මරිය තුමියගේ ආචාර බස් ඇසූ කල ඇගේ කුසෙහි දරුවා ඉපිලෙන්නට වන. එවිට එලිසබෙත් ශුද්ධාත්මයාණන්ගෙන් පූර්ණ ව, 42මහ හඬින් උදන් අනමින්, “ඔබ වනිතාවන් අතර අතිශයින් ආශීර්වාද ලද්දී ය. ඔබ කුස ඔත් දරු ඵලය ද ආශීර්වාද ලද්දේ ය. 43මාගේ සමිඳාණන් වහන්සේගේ මෑණියන් මා වෙත පැමිණීමට තරම් මම කවරෙක් ද? 44මක්නිසා ද ඔබේ ආචාර හඬ මා සවන් ගත වූ කෙණෙහි ම මා කුසෙහි දරුවා ප්‍රීතියෙන් ඉපිලී ගියේ ය. 45සමිඳාණන් වහන්සේගේ නාමයෙන් තමන් හට දුන් පොරොන්දුව ඉටුවන්නේ ම යයි විශ්වාස කළ තැනැත්තී භාග්‍යවන්ත ය”යි කීවා ය.