✟✯✯ ශු. මහා ග්‍රෙගරි පාප්තුමා ✯ ✯ ✟

මෙතුමන්ගේ උපන් දිනය පිළිබඳව නිශ්චිතව සඳහන් වී නැති නමුත් සාමාන්‍යයෙන් පිළිගනු ලබන්නේ ක්‍රිස්තු වර්ෂ 540 දී පමණ රෝම නගරයේ දී මෙතුමා උපත ලැබූ බවය. ඔහුගේ දෙමව්පියන් ඔහුට ග්‍රෙගෝරියස් යන ග්‍රීක නාමයක් තබන අතර එහි ලතින් තේරුම වනුයේ 'දිව' යන්නය.

ග්‍රෙගරි උපත ලැබුවේ සභාව සමඟ සමීප සම්බන්ධතා ඇති ධනවත් හා වංශවත් රෝම පවුලක ය. ඔහුගේ පියා වූ ගෝර්දියානුස්, දේශප්‍රේමි සෙනෙට් සභිකයෙකු ලෙස සේවය කළ අතර කලක් රෝම නගරයේ ප්‍රධානියා ද විය. ග්‍රෙගරිගේ මව වන සිල්වියා ද උසස් පවුලක උපත ලැබූ කෙනෙකි.

රෝම සමාජයේ බොහෝ තරුණයින් මෙන් ග්‍රෙගරි ද විවිධ භාෂාවන්, සාහිත්‍යය, විද්‍යාවන් සහ නීතිය පිළිබඳව පිළිබඳව හැදෑරීය. ඔහු සෑම විෂයක් කෙරෙහිම දැක්වුයේ විශිෂ්ට සමත් කමකි. එලෙසම එතුමන්ට ඉතිහාසය, ගණිතය සහ සංගීතය පිළිබඳව ද තිබුණේ පුළුල් දැනුමකි. වයස 33 වන විට එතුමන්ට තම පියා මෙන් රෝමයේ ප්‍රධානියා ලෙස කටයුතු කිරිමට කිරීමට සිදුවිය.

තම පියාගේ අභාවයෙන් පසුව ඔහු තම පවුලේ නිවාසය ශාන්ත ඇන්ඩෘ අපෝස්තුළුතුමාට කැපකල තාපසාරාමයක් බවට පත් කෙරුවේය. එතුමන්ට පැවිදි ජීවිතය පිළිබඳ වූයේ ගැඹුරු ගෞරවයක් වූ අතර විශේෂයෙන්ම දිළිඳු ජීවිතය පිළිබඳව ඇලුම් කළේය. පසු කලෙක ඊ වන පෙලාගියුස් පාප්තුමන් විසින් ඔහුව තේවාචාර්‍යවරයෙකු ලෙස පත් කරන ලදී.

ක්‍රිස්තු වර්ෂ 590 සැප්තැම්බර් 03 වන දින පාප් ධුරයට පත්වන එතුමන් ක්‍රිස්තු වර්ෂ 604 මාර්තු 12 දින තම අවසන් හුස්ම හෙළන තෙක් ශුද්ධ වූ සභාවේ උන්නතිය වෙනුවෙන් හෝ දායකත්වයක් ලබා දුන්නේ ය. 

දේව වන්දනාවේ බොහෝ වෙනස්කම් ද සිදුවූයේ මෙතුමන්ගේ ධුර කාලය තුළ ය. ග්‍රෙගෝරියානු සජ්ජායනාව ඒ අතරින් මහත් ප්‍රසිද්ධියක් උසුලයි. මෙතුමන් සංගීතඥයන්ගේ ද ගායකයන්ගේ ද ගුරුවරුන්ගේ සහ ඉගෙනුම ලබන්නන්ගේ ද නාම සාන්තුවරයා ලෙස හඳුන්වනු ලැබේ.