꧁☆༒☬✟✟ 2022 සැප්තැම්බර් 28 ✟✟☬༒☆꧂

    පළමුවන කියවීම ජෝබ් 9:1-12, 14-16

1එවිට ජෝබ් මෙසේ පිළිතුරු දුන්නේ ය:

2 “ඔය සියල්ල ඇත්ත ම බව මම හොඳින් දනිමි.

එතුමන්ට විරුද්ධ ව පැමිණිල්ලක් කර මිනිසෙකුට ජයගත හැකි ද?

3පැමිණිලිකරු මෙන් මිනිසාට දෙවිඳුන් සමඟ වාද කළ හැකි ද?

එතුමන් අසන ප්‍රශ්න දහසකින් එකකට වත් මිනිසාට පිළිතුරු දිය හැකි ද?

4දෙවිඳාණෝ ප්‍රඥාසම්පන්න ය;

සර්ව බලධාරී ය.

එතුමන්ට එරෙහි ව කිසිවෙකුට ජයගත හැකි වේ ද?

5එතුමාණෝ හිටි හැටියේ ගිරිකුළු දෙදරවා හරින සේක;

සිය උදහසින් ඒවා පෙරළා දමන සේක;

6මහ පොළොවේ පදනම් කම්පා කරවන සේක;

එහි කණු සොලවන සේක;

7එතුමාණන් අණ කළහොත්, හිරු උදා නොවන්නේ ය;

තරු සඟවා වසා ලීමට එතුමාණන්ට හැකි වන්නේ ය.

8ඒ උතුමාණෝ පමණක් ම අහස් තලය දිග හරින සේක;

මහ සයුර පිට ඇවිදින සේක.

9 මහ වලසා ද මුව සිරස ද හත්දින්න ද දකුණු දිග තාරකා ද මැවූ සේක.

10මිනිස් මනසින් සොයාගත නොහැකි මහත් දේ ද ගණනාවක් නොමැති අසිරිමත් දේ ද කරන සේක.

11මා ළඟින් ම වැඩියත්, එතුමන් මට පෙනෙන්නේ නැත;

මා පසු කොට ගියත් මට දකින්න නොහැකි ය,

12දෙවි තුමන් යමක් ගන්න කල එය වැළැක්විය හැකි සමතා කවරෙක් ද?

‘ඔබ ඔය කරන්නේ කුමක් දැ’යි පවසන්නට කාට හැකි ද?

14එසේ නම්, එතුමන් සමඟ සුදුසු වචනින් වාද විවාද කිරීමට හැකියාවක් මට ඇද් ද?

15මා නිදොස් වුව ද එතුමන්ට උත්තර දීමට මම අපොහොසත් වෙමි.

මම විනිසකරුගෙන් දයාව පතමි.

16මා එතුමන් ඇමතූ විට එතුමන්ගෙන් පිළිතුරක් ලැබුණේ ය.

එතුමාණෝ මට සවන් දෙන සේකැ යි විශ්වාස කළ හැකි ද?

පිළිතුරු ගීය ගීතාවලිය 88:10BC-11, 12-13, 14-15

පිළිතුර - 2මාගේ අයැදුම ඔබ වෙත පැමිණේ වා!

10ඔබ වහන්සේ මළවුන් උදෙසා අසිරිමත් දේ කරන සේක් ද?

ඔව්හු නැඟිට ඔබ පසසන්නෝ ද?

11සොහොන් වළෙහි දී ඔබේ තිර පෙම ගැන ද පාතාලයෙහි දී ඔබේ විශ්වාසවන්තකම ගැන ද කතා කරනු ලැබේ ද?

පිළිතුර - 2මාගේ අයැදුම ඔබ වෙත පැමිණේ වා!

12ඔබේ අසිරිමත් ක්‍රියා අඳුරෙහි දී පෙන්වනු ලැබේ ද?

ඔබේ යහපත්කම මළවුන්ගේ දේශයෙහි දී සිහි කරනු ලැබේ ද?

13සමිඳුනි, මම ඔබට හඬගසන්නෙමි;

අලුයම මාගේ අයැදුම ඔබ වෙත පැමිණේ වා!

පිළිතුර - 2මාගේ අයැදුම ඔබ වෙත පැමිණේ වා!

14සමිඳුනි!

ඔබ මා ප්‍රතික්ෂේප කරන්නේ මන් ද?

මා වෙතින් ඔබේ මුහුණ සඟවා ගන්නේ මන් ද?

15යොවුන් වියේ පටන් පීඩිත ව කෙඳිරි ගාමින් මම මැරෙන්නට ආසන්න ව සිටියෙමි;

ඔබෙන් පැමිණෙන දඬුවම්වල බරින් මම තැළී පොඩි වී සිටියෙමි.

පිළිතුර - 2මාගේ අයැදුම ඔබ වෙත පැමිණේ වා!

ආලේලූයියා පිලිප්පි 3:8-9

8එපමණකුත් නොවේ, මාගේ ස්වාමීන් වන ක්‍රිස්තුස් ජේසුස් වහන්සේ දැනගැන්මේ විශිෂ්ටතාව නිසා ඒ සියල්ල අවාසියකැ යි ගණන්ගනිමි. උන් වහන්සේ නිසා සියලු දේ මට නැති වී ගියා පමණක් නොව, ඒ සියල්ල කුණු කසළ යයි සලකමි. මාගේ කැමැත්ත නම් ක්‍රිස්තුන් වහන්සේ අත්කරගැනීමත්, 9උන් වහන්සේ හා ඒකාබද්ධ වීමත් ය; ව්‍යවස්ථාවෙන් වන මාගේ ම දමිටුකම නොව, ක්‍රිස්තුන් වහන්සේ කෙරෙහි ඇදහීම කරණකොටගෙන ඇදහිල්ල නිසා, දෙවියන් වහන්සේගෙන් වන දමිටුකම ලබාගැනීම ය.

සුබාරංචිය ලූක්  9:57-62

57ඔවුන් මඟ බැස යද්දී එක් මිනිසෙක්, “ඔබ වහන්සේ යන ඕනෑ ම තැනකට වුව ද මමත් ඔබ අනුව එන්නෙමි”යි කී ය. 58ජේසුස් වහන්සේ කතා කොට, “හිවලුන්ට බෙන ද අහසේ කුරුල්ලන්ට කැදලි ද ඇත; එහෙත් මනුෂ්‍ය-පුත්‍රයාණන්ට හිස තැබීමට වත් තැනක් නැතැ”යි ඔහුට වදාළ සේක. 59උන් වහන්සේ තව කෙනෙකුට, “මා අනුව එන්නැ”යි වදාළ සේක. ඔහු: “ස්වාමීනි පළමුකොට මාගේ පියා භූමදාන කරන පිණිස යන්නට මට අවසර දුන මැනවැ”යි කී ය. 60උන් වහන්සේ උත්තර දෙමින්, “මළවුන්ගේ භූමදානය මළවුන් ම කළා වේ; ඔබ ගොස් දෙවියන් වහන්සේගේ රාජ්‍යය ප්‍රකාශ කරන්නැ”යි ඔහුට වදාළ සේක. 61 තවත් කෙනෙක්, “ස්වාමීනි ඔබ අනුව එන්නෙමි; එහෙත් පළමුකොට මාගේ ගෙදර උදවියගෙන් සමු ගෙන ඊමට අවසර දුන මැනවැ”යි කී ය. 62ජේසුස් වහන්සේ, “නගුලට අත තබා ආපසු බලන කිසිවෙක් දෙවියන් වහන්සේගේ රාජ්‍යයට සුදුසු නැතැ”යි ඔහුට වදාළ සේක.