✟✯✯ පෙනෆෝර්ට් හි ශු. රේමන්ඩ් මුනිතුමා ✯ ✯ ✟

 

කුරුස යුද්ධ යුගයේදී ක්‍රිස්තියානි වහලුන්ට උපකාර කිරීමට සහ සභාවේ නීති සංග්‍රහය සංවිධානය කිරීමට සහය ලබා දුන් දොමිනිකන් පූජකයෙකු වන පෙනෆෝර්ට් හි ශාන්ත රේමන්ඩ් මුනිතුමා ජනවාරී 7 වන දින සාන්ත සභා මාතාව සිහි කරනු ලබයි. 

ශාන්ත තෝමස් ඇක්වයිනාස්තුමාගේ සමකාලීනයෙකු වූ මෙතුමා, කතෝලිකයන් නොවන අය සත්‍යාගමට හැරවීම සඳහා “Summa Contra Gentiles” ලිවීමට තෝමස් ඇක්වයිනාස් දේවධර්මාචාර්යවරයාට අනුබල දුන්නේය. සාන්ත රේමන්ඩ්තුමාගේ ධර්මදූත කාර්යයේ ප්‍රතිඵලයක් ලෙස අවම වශයෙන් මුස්ලිම්වරුන් 10,000ක් පමණ ආගමට හැරුණු බව වාර්තා වේ. 

ආර්ගොන් හි රාජකීය මාලිගය සමඟ බැඳීම් ඇති වංශවත් පවුලකින් පැවත එන මෙතුමා 1175 දී නූතන ස්පාඤ්ඤයේ බාර්සිලෝනා අසල කැටලෝනියානු කලාපයේ උපත ලැබීය. 

ඔහු තම අධ්‍යයන කටයුතුවල ඉතා දක්ෂ වූ අතර, දර්ශනවාදය සඳහා දැක්වූ ප්‍රවීණත්වය නිසා  වයස අවුරුදු 20 දී බාර්සිලෝනාහි දේව ධර්මය විෂය ඉගැන්වීමට ඔහුව පත් කරන ලදී. ගුරුවරයෙකු ලෙස, මෙම තරුණයා කතෝලික ඇදහිල්ල සහ සදාචාරය පිළිබඳ වෘත්තිය හා භාවිතය සමඟ තර්කානුකූලව එකඟ වීමට සෑම විටම කටයුතු කළේය. දුප්පතුන් සහ දුක් විඳින්නන් සඳහා කැපී පෙනෙන සැලකිල්ලක් දක්වන ලදි. 

වයස අවුරුදු 30 දී පමණ මෙම ස්පාඤ්ඤ විශාරදයා සභා නීතිය හැදෑරීමට ඉතාලියේ බොලොග්නාවට ගියේය. ආචාර්ය උපාධිය ලබා ගත් මෙතුමා 1219 දක්වා එහි ඉගැන්වූ අතර, බාර්සිලෝනා රදගුරුවරයා ඔහුට රදගුරු පදවියේ නිල තනතුරක් ලබා දුන්නේය. 1222 දී, 47 හැවිරිදි රේමන්ඩ් දොමිනිකන් නිකායට සම්බන්ධ වූ අතර, ඔහු ඔහුගේ කැපී පෙනෙන දිගු ජීවිතයේ ඉදිරි වසර 53 දොමිනිකානු පූජකයෙක් ලෙස කටයුතු කරන ලදි. 

ඔහු වරක් ප්‍රදර්ශනය කළ බුද්ධිමය අභිමානය වෙනුවෙන් පසුතැවීමක් ලෙස, පාපොච්චාරණය කරන්නන් විසින් භාවිතා කිරීම සඳහා සදාචාරාත්මක දේවධර්මය පිළිබඳ අත්පොතක් ලිවීමට හිටපු මහාචාර්යවරයාගෙන් ඉල්ලා සිටියේය. එහි ප්‍රතිඵලයක් ලෙස “Summa Casuum”  කෘතිය රචනා කළේය. එය ඔහු සභාවට කළ පුරෝගාමී දායකත්වයෙන් පළමුවැන්නයි. මේ අතර, දේශනා කිරීම සඳහා ඔහුගේ නිකායේ කැපවීම අනුව, මෙම දොමිනිකන් පූජකයා ඇදහිල්ල පතුරුවා හැරීමට සහ සභාවේ නැතිවූ සාමාජිකයින් නැවත ගෙන ඒමට උත්සාහ කළේය. 

ඔහු බාර්සිලෝනා හි සිටි කාලය තුළ, අරගොන්හි ජේම්ස් රජුට දයාවේ අප ස්වාමිදූගේ පැවිදි නිකාය ස්ථාපිත කිරීමට උදව් කළ අතර, එහි සාමාජිකයින් මුස්ලිම් ප්‍රදේශයේ වහල්භාවයට ගෙන ගිය අයව මුදා ගැනීමට කටයුතු කරන ලදි. මෙම කාල පරිච්ඡේදයේදීම රේමන්ඩ්තුමා විසින් දේශනා කිරීම තුළින් කුරුස යුද්ධ සදහා සහය දුන් අතර, විදේශීය තර්ජනවලින් තම ජනතාව, සංස්කෘතිය ආරක්ෂා කර ගැනීමට ඇදහිලිවන්තයන් දිරිමත් කළේය. 

IXවන ග්‍රෙගරි පාප් වහන්සේ 1230 දී මෙම දොමිනිකන් පූජකයාව රෝමයට කැඳවා, සභාවේ විවිධ තීරණ සහ නියෝග එක් ක්‍රමානුකූල හා ඒකාකාර එකතුවකට සම්පාදනය කරන ලෙස ඉල්ලා සිටියේය. එහි ප්‍රතිඵලයක් වශයෙන් පොත් පහක් මෙතුමා රචනා කරන ලදි. මෙම කාලය තුළ රේමන්ඩ් පාප්තුමාගේ පුද්ගලික පාපොච්චාරණය සහ සමීප උපදේශකයා වූ අතර, 1235 දී ටරගෝනාහි අගරදගුරු තනතුර පිරිනමන ලද නමුත් මෙතුමා එම පත්වීම ප්‍රතික්ෂේප කළ බව පැවසේ. 

පසුකාලීනව, දොමිනිකන්වරුන්ගේ නායකත්වයට රේමන්ඩ්තුමාව තෝරා ගන්නා ලදී, නමුත් ඔහුගේ වයස වැඩි වීම හේතුවෙන් ඔහු එම තනතුරේ කටයුතු කරන ලද්දේ වසර දෙකක් පමණි. කෙසේ වෙතත්, ඔහු මෙම තනතුරෙන් ඉල්ලා අස්වීමෙන් පසු දශක තුනකට වඩා වැඩි කාලයක් ජීවත් විය. මෙම කාලය තුළ ඔහුගේ වෘත්තියේ මූලික කරුණු කෙරෙහි අවධානය යොමු කිරීමට ඔහුට හැකි විය: යාච්ඤාවෙන් දෙවියන් වහන්සේට ප්‍රශංසා කිරීම, දේශනා කිරීම තුළින් ඔහු ප්‍රසිද්ධ විය. මෙතුමාගේ පසුකාලීන ජයග්‍රහණ අතර ක්‍රිස්තියානි නොවන අයට ශුභාරංචිය ප්‍රකාශ කිරීම සඳහා භාෂා පාසල් පිහිටුවීම ඇතුළත් විය. 

මෙතුමාගේ ඇදහිල්ලේ දිගු වන්දනා ගමන ඔහුගේ උපතෙන් වසර 100 කට පමණ පසු 1275 ජනවාරි 6 වන දින අවසන් විය. 1601 දී VIII ක්ලෙමන්ට් පාප්තුමා විසින් මෙතුමාව සාන්තුවරභාවයට පත් කරන ලදී. 

මෙතුමා පොදුවේ නීතීඥයින් සහ විශේෂයෙන්ම සභා නීතීඥයින්ගේ නාම සාන්තුවරයා ලෙස නම් කර ඇත.