ඇන්ඩ්‍රේ සහෝදරතුමා 1845 දි ක්විබෙක් හි දිළිඳු පවුලක උපත ලැබූ බව ශාන්ත ජෝසප් ඔරටෝරි පවසයි. ඔහුගේ පියා ඔහුට වයස අවුරුදු නවයේදී රැකියාව ස්ථානයේ සිදුවූ අනතුරකින් මිය ගිය අතර ඔහුගේ මව ඉන් වසර තුනකට පසු මිය ගියේය. ඔහුගේ පවුල් ජීවතය බිඳී ගිය අතර උපතේ සිටම සාක්ෂරතාව සහ ශාරීරිකව දුර්වල වූ ඇන්ඩ්‍රේ සහෝදරතුමා වසර ගණනාවක් රැකියාවෙන් රැකියාවට මාරු විය.
1870 දී ඔහු මොන්ට්‍රියෙල්හි සිරි කුරුස පැවිදි නිකායේ නවක අපේක්ෂකයෙකු ලෙස ඉදිරිපත් විය. ඔහුගේ අසනීප තත්ත්වය නිසා ඔවුන් ඔහුව පිළිගැනීමට අකමැති වූ නමුත්, රදගුරුවරයාගේ ඉල්ලීම මත ඔහුට ඉතා සුළු රැකියාවක් පවරන ලදී. ඔහු Notre-Dame College හි දොරටු පාලකයෙකු බවට පත් කරන ලද අතර, ඔහුගේ දෛනික කාර්යයන් වූයේ බිම සහ ජනෙල් සේදීම, ලාම්පු පිරිසිදු කිරීම, දර රැගෙන යාම සහ පණිවිඩකරුවෙකු ලෙස වැඩ කිරීමයි.
"චිත්‍ර ශිල්පීන් ලස්සනම පින්තූර අඳින්නේ ඉතා කුඩාම බුරුසු වලින්" යැයි ඇන්ඩ්‍රේ සහෝදරතුමා පවසයි.
ඔහු රෝගාතුර වූවන් හා සිත් තැවුලෙන් පසු වූවන් සාදරයෙන් පිළිගත්තේ ජුසේ මුනිතුමා වෙත යාච්ඤා කරන ලෙස ඔවුන්ට ආරාධනා කරමිනි. ඔවුන්ගේ යාච්ඤාවලට පිළිතුරු ලැබුණු බව මිනිසුන් වාර්තා කරන විට ඔහුගේ කීර්තිය ක්‍රමයෙන් වර්ධනය විය. ඔහුව මුණ ගැසීමට වසර විසිපහක් පුරාවට අමුත්තන් නිතර පැමිණියේය. ජුසේ මුනිතුමා කෙරෙහි ඇති භක්තිය නිසා ඔහු මිතුරන්ගේ උදව්වෙන් සහ සිසුන්ගේ කොණ්ඩා කැපීමෙන් උපයා ගත් මුදලින් දේවස්ථානයක් ඉදි කළේය. වන්දනාකරුවන් වැඩි වැඩියෙන් පැමිණීමත් සමඟ දේවස්ථානය විශාල කිරීමට මෙතුමාට සිදුවිය.
ඇන්ඩ්‍රේ සහෝදරතුමා 1937දී මිය ගිය අතර ඔහුගේ අවමංගල්‍ය උත්සවයට සහ භූමදානය සඳහා මිලියනයකට වඩා වැඩි පිරිසක් සහභාගි විය.
2010 පෙබරවාරි 19 වන දින ශාන්ත-ජෙරෝම් හි පියරේ මොරිසෙට් රදගුරුතුමා පැවසුවේ "ඇන්ඩ්‍රේ සහෝදරතුමා ඔහුගේ ජීවිතය ඉතා නිහතමානීව ගත කළ" බවයි.
"ජුසේ මුනිතුමා කෙරෙහි ගැඹුරු ඇදහිල්ලකින් සහ භක්තියෙන් මඟ පෙන්වූ ඔහු තම ජීවිතය යාච්ඤා කිරීමට, දුප්පතුන්ට සේවය කිරීමට, ආගන්තුකයන් පිළිගැනීමට, රෝගීන් සුව කිරීමට සහ දුක් වේදනාවෙන් සිටින්නන් සනසාලීමට කැප කළේය. ඇදහිල්ලෙන් හා ආදරයෙන් සිටින සියලුම කැනේඩියානුවන්ට අද දක්වාම ඔහුගේ මතකය වැදගත් සාක්ෂියක් ලෙස පවතී.” යනුවෙන් රදගුරුතුමා තවදුරටත් පැවසීය.
ශාන්ත ඇන්ඩ්‍රේ බෙසෙට් 2010 ඔක්තෝම්බර් 17 වන දින ශාන්ත පීතර චතුරශ්‍රයේ දී XVI වන බෙනඩික්ට් පාප්තුමා සාන්තුවර භාවයට ඔසවන ලදී.
0 Comments