✟✟ 𝟚𝟘𝟚𝟚 දෙසැම්බර් 6 ✟✟

පළමුවන කියවීම යෙසායා 40:1-11

1“ සනසන්න, මාගේ සෙනඟ සනසන්නැ”යි ඔබේ දෙවිඳාණෝ වදාරන සේක.

2“කරුණාවෙන් ජෙරුසලම් වැසියන්ට කතා කරන්න;

හඬ නඟා ඔවුන්ට මෙසේ කියන්න: ඔවුන්ගේ වහල්කමේ කාලය දැන් ඉවර වී ඇත;

පව් කමාව ඔවුන්ට ලැබී ඇත.

සියලු පව්වලට දඬුවම දෙගුණය බැගින් සමිඳුන්ගේ හස්තයෙන් ම ඔවුන්ට ලැබී ඇත.”

3 මෙසේ කියන හඬට සවන් දෙන්න:

“වනාන්තරයේ සමිඳුන් හට මාවතක් එළි කරන්න;

පාළුකරයේ අපේ දෙවිඳුන් හට මහ පාරක් සාදන්න.

4සියලු මිටියාවත් පුරවනු ලබන්නේ ය;

සියලු කඳු හෙල් කපා පහත් කරනු ලබන්නේ ය;

සියලු හෙල් සමතලා කරනු ලබන්නේ ය;

රළු තැන් සුමුදු කරනු ලබන්නේ ය;

5සමිඳුන්ගේ තේජාලංකාරය එවිට එළිදරව් වන්නේ ය.

සකල මිනිස් වර්ගයා එය නරඹන්නෝ ය.

මෙසේ වදාළේ සමිඳාණෝ ම ය.”

6 “පණිවුඩයක් ප්‍රකාශ කරන්නැ”යි හඬක් කී ය.

“කුමන පණිවුඩයක් ප්‍රකාශ කරම් දැ”යි මම ඇසීමි.

“සකල මිනිස් වර්ගයා තණ කොළ හා සමාන වෙති;

ඔහුගේ සුන්දරතාව වන මල් මෙන් පහ වී යයි.

7සමිඳුන්ගේ හුස්ම වැදුණ විට තණ කොළ වියළී යයි;

මල් පර වෙයි.

මිනිස් වර්ගයා ඒ තණ කොළ හා සමාන ය.

8තණ කොළ වියළෙයි;

මල් පර වෙයි.

එහෙත්, අපේ දෙවිඳුන්ගේ වචනය සදහට ම පවතියි.”

9සියොන්ට සුබ ආරංචිය ගෙනෙන දූතයාණෙනි, උස් කන්දට නඟින්න;

සියොන්ට සුබ ආරංචිය දන්වන්න.

ජෙරුසලමට සුබ ආරංචිය ගෙනෙන දූතයාණෙනි, හඬ නඟා ප්‍රකාශ කරන්න;

බිය නොවී උස් හඬින්, “ඔබේ දෙවිඳාණෝ වඩින සේකැ”යි ජුදාහි නගරවලට ප්‍රකාශ කරන්න.

10 මහෝත්තම දෙවි ස්වාමීන් වහන්සේ බලපරාක්‍රමයෙන් වඩින සේක.

වික්‍රමයෙන් පාලනය කරන්න වඩින සේක.

ත්‍යාගයන් එතුමාණෝ තමන් සමඟ ගෙන එන සේක.

තම සෙනඟට විපාකයන් ප්‍රදානය කරන සේක.

11 එඬේරෙකු සේ එතුමාණෝ, තම රැළ පෝෂණය කරන සේක;

දෑතින් බැටළු පැටවුන් වඩාගෙන, ළයෙහි උන් හොවාගෙන යන සේක;

කිරි දෙන බැටළුදෙනුන්ට මඟපෙන්වන සේක.

පිළිතුරු ගීය ගීතාවලිය 96:1-2, 3 AND 10AC, 11-12, 13