꧁☆༒☬✟✟ 2022 පෙබරවාරි 13 ✟✟☬༒☆꧂

 

                               2022 පෙබරවාරි 13 ඉරිදා සාමාන්‍ය සමය හයවන සතිය            

පළමු කියවීම ජෙරමියා 17:5-8

5සමිඳාණෝ මෙසේ වදාරන සේක:

“මිනිසුන් කෙරෙහි විශ්වාසය තබන, මියයන සුලු සිරුර ශක්තිය කරගෙන, සමිඳුන් කෙරෙන් හැරී ඉවත් ව යන මිනිසා සාප ලද්දෙකි.

6ඔහු පාළුකරයෙහි ඇති පඳුරකට සමාන වේ.

යහපත පැමිණි විට එය ඔහුට නොපෙනේ.

පාළුකරයෙහි වියළි තැන්හි, මිනිසුන් නොවසන ලුණු බිම්හි ඔහු වාසය කරයි.

7සමිඳුන් කෙරෙහි විශ්වාසය තබන, සමිඳුන් තරයේ විශ්වාස කරන මිනිසා භාග්‍යවන්තයෙකි.

8 ඔහු, ගං ඉවුරේ සිටුවා ඇති, ගඟට ම මුල් ඇද ඇති;

ගිම්හානයට කිසි බියක් නැති;

කොළ පර වී යාමක් නැති;

නියඟ කාලය ගැන කරදර නැති;

නොනැවතී දිගට ම පලදාවක් ඇති ගසක් හා සමාන වේ.

පිළිතුරු ගීය1:1-2, 3, 4 AND 6

1දුදනන් උපදෙස් අනුව නොයන,

පව්කරුවන්ගේ මඟ නොයන,

දෙවියන් වහන්සේ ගරහන්නන් ඇසුරු නොකරන,

2සමිඳාණන් වහන්සේගේ විනයෙහි ප්‍රීති ප්‍රමුදිත වන, දිවා රෑ එය භාවනා කරන මිනිසා භාග්‍යවන්තයෙක් වන්නේ ය.

3 ඔහු ඇල දොළ අද්දර සිටුවා ඇති, නියම කලට පල දරන, කොළ පර වී නොයන ගසකට සමාන ය;

ඔහු කරන සැම දේ සරු සාර වේ.

4පවිටු දනෝ එසේ නොවෙති;

ඔව්හු සුළඟේ යන බොල් හා සමාන වන්නෝ ය.6 දමිටුන් හට සමිඳාණෝ සරණ වන සේක.

පවිටුන්ගේ මාර්ගය විනාශයට යන්නේ ය.

දෙවන කියවීම 1 කොරින්ති15:12, 16-20

12 අප දේශනා කරන්නේ ක්‍රිස්තුන් වහන්සේ මළවුන්ගෙන් උත්ථාන කරනු ලැබූ බව නම්, මළවුන්ගෙන් උත්ථාන වීමක් නැතැ යි ඔබගෙන් සමහරෙකු කියන්නේ කෙසේ ද?

16මන්ද, මළවුන් උත්ථාන කරනු ලැබීමක් නැත්නම්, ක්‍රිස්තුන් වහන්සේත් උත්ථාන කරනු නොලැබූ සේක. 17ක්‍රිස්තුන් වහන්සේ උත්ථාන කරනු නොලැබූ සේක් නම් ඔබගේ ඇදහීම නිරර්ථක ය; ඔබ තවමත් පාපයෙහි ඇලී සිටින්නහු ය. 18එපමණක් නොව, ක්‍රිස්තුන් වහන්සේ අදහාගෙන මියගිය අය ද සදහට ම විනාශ වී ඇත. 19ක්‍රිස්තුන් වහන්සේ තුළ අපේ බලාපොරොත්තුව මේ ජීවිතයට පමණක් සීමා වූවක් නම්, අපි සියල්ලන්ට ම වඩා කාලකණ්ණියෝ වෙමු.

20එහෙත් සැබැවින් ම ක්‍රිස්තුන් වහන්සේ මළවුන්ගෙන් උත්ථාන වී සිටින සේක් ම ය. මෙය මළවුන් උත්ථාන කරනු ලබන බවට සහතිකය වේ.

ආලේලූයියා ලූක්6:23AB

23  ඒ දවස්වල දී ප්‍රමෝද වන්න, ප්‍රීතියෙන් නටන්න; මක්නිසා ද යත්, ස්වර්ගයෙහි ඔබගේ පල විපාක ඉමහත් වනු ඇත;

සුබාරංචිය ලූක්6:17, 20-26

17 උන් වහන්සේ ඔවුන් සමඟ කන්දෙන් බැස තැනිතලා බිමක නැවතී සිටි සේක; උන් වහන්සේගේ ශ්‍රාවකයන්ගෙන් මහා සමූහයක් ද, මුළු ජුදයෙන් හා ජෙරුසලමෙනුත්, තීර්හි සහ සීදොනයෙහි මුහුදුකරයෙනුත් උන් වහන්සේගේ දේශනා අසන්නට හා සිය රෝග සුව කරවාගන්නට ආ බොහෝ දෙනෙක් ද එහි වූ හ.

20එකල උන් වහන්සේ සිය ශ්‍රාවකයන් දෙස බලා මෙ‍සේ වදාළ සේක:

“දිළිඳු වූ ඔබ භාග්‍යවන්තයෝ ය;

මන්ද, දෙවියන් වහන්සේගේ රාජ්‍යය ඔබගේ ය.

21දැන් සාගිනි ඇති ඔබ භාග්‍යවන්තයෝ ය;

මන්ද, ඔබ තෘප්තිමත් වනු ඇත.

දැන් කඳුළු හෙළන ඔබ භාග්‍යවන්තයෝ ය;

මන්ද, ඔබ සිනාසෙනු ඇත.

22  මනුෂ්‍ය-පුත්‍රයාණන් නිසා මිනිසුන් ඔබට වෛර බැඳ, ඔබ ප්‍රතික්ෂේප කොට, ඔබට නින්දා කොට, ඔබේ නාමය හෙළා දකින කල ඔබ භාග්‍යවන්තයෝ ය. 23 ඒ දවස්වල දී ප්‍රමෝද වන්න, ප්‍රීතියෙන් නටන්න; මක්නිසා ද යත්, ස්වර්ගයෙහි ඔබගේ පල විපාක ඉමහත් වනු ඇත; ඔවුන්ගේ පියවරු දිවැසිවරයන්ට ද එසේ ම කළහ.

24අහෝ, ධනවත් ඔබට වන විපතක මහත!

ඔබේ සැපවත් ජීවිතය ඔබ විඳ හමාර ය.

25අහෝ, දැන් පුෂ්ටිමත් ව සිටින ඔබට වන විපතක මහත!

ඔබට, සාගිනි වනු ඇත.

අහෝ දැන් සිනාසෙන ඔබට වන විපතක මහත!

ඔබ හඬා වැලපෙනු ඇත.

26අහෝ, මිනිසුන් ඔබ පසසන විට ඔබට වන විපතක මහත!

ඔවුන්ගේ පියවරුන් බොරු දිවැසිවරයන්ටත් කෙළේ එය ම ය.”