꧁☆✟✟ 2023 අප්‍රේල් 15 ✟✟☆꧂

                                     2023 අප්‍රේල් 15 සිකුරාදා - පාස්කු සතිය                         

පළමුවන කියවීම ක්‍රියා 4, 13-21

13උගත්කමක් නැති සාමාන්‍ය මිනිසුන් වශයෙන් සිටි පේදුරුගේ ද ජොහන්ගේ ද නිර්භීතකම දුටු ඔව්හු මවිත වූ හ. ඔවුන් ජේසුස් වහන්සේ ඇසුරෙහි සිටියවුන් බව ද පෙනී ගියේ ය. 14සුවපත් කරනු ලැබූ මිනිසා ඔවුන් සමඟ සිටි බැවින්, ඒ දෙදෙනාට විරුද්ධ ව කිසිවක් කියන්නට ඔවුන්ට නොහැකි විය. 15එබැවින් මන්ත්‍රණ සභාවෙන් බැහැර යන්නට ඔවුන්ට අණ කර, ඔව්හු තම තමන් අතර සාකච්ඡා කරමින් මෙසේ කී හ: 16“අපි මේ මිනිසුන්ට කුමක් කරමු ද? ඔවුන් විසින් විශිෂ්ඨ, අරුමපුදුම දෙයක් කරන ලද බව ජෙරුසලමෙහි සියලු වැසියන්ට පෙනී ගොස් ඇත. එවැන්නක් නැතැ යි කියන්නට අපට නොහැකි ය. 17එබැවින්, ජනයා අතර එය තවදුරටත් පතළ නොවන පිණිස මින්පසු මේ නාමයෙන් කිසි ම කෙනෙකුට කතා නොකරන මෙන් අපි ඔවුන්ට තර්ජනය කරමු.” 18ඉන්පසු ඔව්හු ඔවුන් කැඳවා ජේසුස් වහන්සේගේ නාමයෙන් කොහෙත් ම කතා නොකරන මෙන් ද නූගන්වන මෙන් ද ඔවුන්ට අණ කළහ.

19එහෙත් පේදුරු ද ජොහන් ද පිළිතුරු දෙමින්, “දෙවියන් වහන්සේට කීකරු වීමට වඩා ඔබට කීකරු වීම හරි දැ යි, දෙවියන් වහන්සේ ඉදිරියේ ඔබ ම විනිශ්චය කරගන්න. 20මන්ද, අප ඇසූ දුටු දේ ගැන කතා නොකර සිටින්නට අපට නොහැකි ම ය”යි කී හ. 21ඔව්හු ඔවුන්ට තවදුරටත් තර්ජනය කොට නිදහස් කර යන්නට හැරියෝ ය. සිදු වූ දේ ගැන සියලු දෙනා දෙවියන් වහන්සේට ප්‍රශංසා කළ බැවින්, ජනයා නිසා ඒ දෙදෙනාට දඬුවම් කිරීමට ඔවුන්ට මඟක් නො වී ය.

පිළිතුරු ගීය ගීතාවලිය 118: 1,14-21

පිළිතුරiසමිඳුනි, ඔබ මට පිළිතුරු ඳුන් බැවින් මම ඔබට ස්තූති කරන්නෙමි. ආලේලූයා

1 සමිඳුන්ට ස්තුති කරන්න. මන්ද, එතුමාණෝ යහපත් ය.

එතුමන්ගේ තිර පෙම සදාකාලයට පවත්නේ ය.

14 සමිඳාණෝ මාගේ සවිය ද ගීය ද වෙති;

එතුමාණෝ මාගේ ගැළවුම්කාරයාණෝ ය.

15ප්‍රීතිවීමේ හා ගැළවීමේ හඬට සවන් දෙන්න.

දමිටුන්ගේ කූඩාරම්වල ජය නාදය ඇසේ.

සමිඳුන්ගේ බාහු බලය විකුම් දක්වයි.

පිළිතුරiසමිඳුනි, ඔබ මට පිළිතුරු ඳුන් බැවින් මම ඔබට ස්තූති කරන්නෙමි. ආලේලූයා

16සමිඳුන්ගේ බාහු බලය උදාර ය.

සමිඳුන්ගේ බාහු බලය විකුම් දක්වයි.

17මම නොනැසී, ජීවත් ව සිටින්නෙමි;

සමිඳුන්ගේ ක්‍රියා ප්‍රකාශ කරන්නෙමි.

18සමිඳාණෝ දැඩි ලෙස මට දඬුවම් දුන් සේක.

එහෙත්, මරුවාට මා පාවා නුදුන් සේක.

පිළිතුරiසමිඳුනි, ඔබ මට පිළිතුරු ඳුන් බැවින් මම ඔබට ස්තූති කරන්නෙමි. ආලේලූයා

19දමිටුකමේ දොරටු මට හැර දෙන්න;

එවිට, එයින් මම ඇතුල් වී සමිඳුන්ට ස්තුති කරන්නෙමි.

20මෙන්න, සමිඳුන්ගේ දොරටුව!

දැහැමියෝ එයින් ඇතුල් වන්නෝ ය.

21මම ඔබට ස්තුති කරන්නෙමි, මන්ද, ඔබ මට පිළිතුරු දී මාගේ ගැළවීම වූ සේක.

පිළිතුරiසමිඳුනි, ඔබ මට පිළිතුරු ඳුන් බැවින් මම ඔබට ස්තූති කරන්නෙමි. ආලේලූයා

සාධුකාරය ගීතාවලිය 118:24

24මෙන්න, සමිඳුන්ගේ ජය මංගල දිනය!

මෙදින අපි ප්‍රීති වමු;

සන්තෝෂ වමු.

සුබාරංචිය මාක් 16,9-15

9සතියේ පළමු වන දා අලුයම ජේසුස් වහන්සේ නැඟිට වදාළ කල, උන් වහන්සේ තමන් විසින් දුෂ්ටාත්මයන් සත් දෙනෙකු දුරු කරනු ලැබූ මග්දලායේ මරියාට මුලින් ම දර්ශනය වූ සේක. 10ඈ ගොස්, අඬමින් වැලපෙමින් සිටි උන් වහන්සේගේ හිතවතුන්ට එපවත් සැළ කළා ය. 11එහෙත්, උන් වහන්සේ ජීවමාන ව සිටින බව ද ඇයට දර්ශනය වූ බව ද ඇසූ විට ඔව්හු එය විශ්වාස නො කළහ.

12ඉක්බිති ඔවුන්ගෙන් දෙදෙනෙකු පිටිසරට යන කල උන් වහන්සේ අන් විලසකින් ඔවුන්ට දර්ශනය වූ සේක. 13ඒ දෙදෙන ආපසු ගොස් අනික් අයට එපවත් දැන්වූ හ. ඔව්හු ඔවුන් කී දෙය ද විශ්වාස නො කළහ.

14පසුව ජේසුස් වහන්සේ, එකොළොස් දෙනා ආහාර වළඳමින් සිටිය දී ඔවුන්ට ද දර්ශනය වී, උන් වහන්සේ උත්ථාන වූ පසු තමන් වහන්සේ දුටුවන් කීදේ ඔවුන් නොඇදහූ නිසා, ඔවුන්ගේ අවිශ්වාසය හා සිත් දැඩි කම ගැන ඔවුන්ට දොස් පැවරූ සේක. 15උන් වහන්සේ ඔවුන් අමතා, “ලොව පුරා ගොස් සකල සත්ත්වයා හට සුබ අස්න දේශනා කරන්න; 16අදහා බව්තීස්ම-ස්නාපනය ලබන තැනැත්තේ ගැළවීම ලබන්නේ ය; එහෙත්, අදහා නොගත් තැනැත්තේ වරදකරු යයි තීන්දුව ලබන්නේ ය.