✟✯✯ශු ජෝන් ඔගිල්වි මුනිතුමා ✯ ✯ ✟

 

ජෝන් ඔගිල්වි (1580 - 10 මාර්තු 1615) ස්කොට්ලන්ත ජේසු නිකායික ප්‍රාණපරිත්‍යාගීවරයෙකි. 17 වන ශතවර්ෂයේ ස්කොට්ලන්තයේ පිරිහෙමින් පවතින රෝමානු කතෝලික ප්‍රජාවට සේවය කිරීම සඳහා පූජකයෙකු ලෙස ඔහු කළ සේවය සහ ඔහුගේ ඇදහිල්ල වෙනුවෙන් මෙතුමාව එල්ලා මරා දමන ලදි.  ඔහු ආගමික ප්‍රතිසංස්කරණයෙන් පසු සාන්තුවරයට පත් වූ එකම ස්කොට්ලන්ත කතෝලිකයා වේ.

ජෝන් ඔගිල්වි යනු එක්සත් රාජධානියේ ස්කොට්ලන්තයේ බැන්ෆ්ෂයර් හි ඩ්‍රම්නකීත්ගේ වතුයාය හිමි වංශවත් කැල්වින්වාදියෙකු වූ වෝල්ටර් ඔගිල්විගේ වැඩිමහල් පුත්‍රයාය. ඔහුගේ පවුල අර්ධ වශයෙන් කතෝලික සහ අර්ධ වශයෙන් ප්‍රෙස්බිටේරියන් විය. වයස අවුරුදු දොළහේදී ඔහුව අධ්‍යාපනය සඳහා යුරෝපීය මහාද්වීපයට යවන ලදී. ඔහු ජර්මනියේ රෙජන්ස්බර්ග්හි බෙනදිකානුවන් යටතේත් මොරාවියාවේ ඔල්මුට්ස් සහ බ්‍රන් හි ජේසු නිකායිකවරුන් යටතේත් කතෝලික අධ්‍යාපන ආයතන ගණනාවක අධ්‍යාපනය හදාරන ලදි.

එම යුගයේ යුරෝපය ගිලගත් ආගමික මතභේද සහ කැළඹීම් මධ්‍යයේ ඔහු කතෝලිකයෙකු වීමට තීරණය කළේය. 1597 දී, වයස අවුරුදු 17 දී, ඔහුව කතෝලික සභාවට පිළිගන්නා ලද්දේ බෙල්ජියමේ ලූවේන් හි  ශුද්ධ ලියවිලි පිළිබඳ මහාචාර්ය කොර්නේලියස් ලපීඩ් ජේසු නිකායික පියතුමා විසිනි. ජෝන් ඔගිල්වි 1599 දී ජේසු නිකායට සම්බන්ධ වූ අතර 1613 දී පැරිසියේදී පූජකයෙකු ලෙස පැවිදි ජීවිතයට ඇතුළත් විය. පැවිදි ජීවිතයට ගිය පසු ඔහු නෝමැන්ඩි හි රුවන් හි සේවය කළ අතර එහිදී ග්ලාස්ගෝ ප්‍රදේශයේ ඉතිරිව සිටින කතෝලිකයන් කිහිප දෙනෙකුට සේවය කිරීම සඳහා ස්කොට්ලන්තයට යවන ලෙස ඔහු නැවත නැවතත් ඉල්ලීම් කළේය. ක්‍රි ව. 1560 න් පසු කතෝලික ධර්මය දේශනා කිරීම, ආගමට හැරවීම හෝ වෙනත් ආකාරයකින් අනුමත කිරීම ස්කොට්ලන්තයේ නීති විරෝධී ක්‍රියාවන් විය.

ඔහුගේ පරම්පරාව නිසා එහි සිටි සමහර කතෝලික වංශවතුන් ඔහුට උපකාර කරනු ඇතැයි ඔහුගේ බලාපොරොත්තුව විය. කිසිවක් සොයා නොගත් ඔහු ලන්ඩනයට ගොස් නැවත පැරිසියට ගොස් අවසානයේ 1613 නොවැම්බර් මාසයේදී ජෝන් වොට්සන් නම් අශ්ව වෙළෙන්දෙකු ලෙස වෙස්වලාගෙන ස්කොට්ලන්තයට පැමිණියේය. ඉන්පසු ඔහු රහසිගතව දේශනා කිරීමට පටන් ගත් අතර, පෞද්ගලික නිවාසවල රහසිගතව දිව්‍ය පූජාව පැවැත්වීය

ඔහුගේ මෙම සේවය වසරකටත් අඩු කාලයක් පැවතිණි. 1614 ඔක්තෝම්බර් මාසයේදී, ස්කොට්ලන්ත සභාවේ අගරදගුරු වූ ස්පොටිස්වුඩ් ගේ නියෝග යටතේ ජෝන් ඔගිල්විව ග්ලාස්ගෝහිදී අත්අඩංගුවට ගෙන සිරගත කරන ලදී. මුලදී ඔහුට හොඳින් සලකනු ලැබුවද, පාපොච්චාරණය කිරීම අඛණ්ඩව ප්‍රතික්ෂේප කිරීමෙන් පසුව,  වධ හිංසාවට ලක් විය.ජෝන් ඔගිල්වි ස්කොට්ලන්තයේ හයවන ජේම්ස් රජුට පක්ෂපාතී වීමට ප්‍රතිඥා දීම ප්‍රතික්ෂේප කිරීම නිසා තත්වය තවත් උග්‍ර අතට හැරිණි.‍

ඔහුව නඩු විභාගයට ලක් කළේ ඉහත චෝදනා සඳහා ය. නඩු විභාගයේ දී වරදකරු වූ මෙතුමාව 1615 මාර්තු 10 වන දින ග්ලාස්ගෝ ක්‍රොස් නගරයේ දී එල්ලා මරා දමන ලදී. එවිට එතුමාගේ වයස අවුරුදු තිස් හයක් විය. 

ජෝන් ඔගිල්වි ගේ අවසන් වචන වූයේ: "මෙතැන සැඟවුණු කතෝලිකයන් සිටී නම්, ඔවුන්ට මා වෙනුවෙන් යාච්ඤා කිරීමට ඉඩ දෙන්න, නමුත් මිථ්‍යාදෘෂ්ටිකයන්ගේ යාච්ඤාවන් මට අවශ්‍ය නැත." යන්නය.  අවසානයේ දී  ඔහු සඟවාගෙන සිටි ජපමාලය සෙනඟ අතරට විසි කළ අතර  පුරාවෘත්තයට අනුව, ඔහුගේ සතුරෙකු එය අල්ලා ගත් අතර පසුව ජීවිත කාලය පුරාම භක්තිමත්, කතෝලිකයෙකු බවට පත්විය.