පළමුවන කියවීම 1 කොරින්ති 7:25-31
25අවිවාහකයන් ගැන මට සමිඳාණන් වහන්සේගෙන් ආඥාවක් ලැබී නැත. එහෙත්, සමිඳාණන් වහන්සේගේ කරුණාවෙන් විශ්වාස කටයුතු තැනැත්තෙකු වන මම, මගේ අදහස කියනු කැමැත්තෙමි.
26මේ කාලයේ ඇති දුක් විපත් නිසා යමෙක් තමා සිටින තත්ත්වයෙහි ම සිටින්නේ නම් යහපතැ යි සිතමි. 27ඔබ ස්ත්‍රියක සමඟ විවාහ වී සිටින්නෙහි නම් ඇයගෙන් නිදහස් වන්නට නොසොයන්න. ඔබ ස්ත්‍රියක සමඟ විවාහ වී නැත්නම් භාර්යාවක් නොසොයන්න. 28එහෙත් ඔබ විවාහ වූවත් එයින් ඔබට පාපයක් නැත. කන්‍යාවක විවාහ වූවත් එයින් ඇයට පාපයක් නැත. එසේ වුව ද එවැනි අයට මේ ලෝකයෙහි දුක් විපත් ඇති වන්නේ ය. මම ඔබ ඒවායින් වළක්වාලීමට කැමැත්තෙමි.
29සහෝදරවරුනි, මේ දේ කියනු කැමැත්තෙමි. එනම් වැඩි කාලයක් ඉතිරි වී නැත. මෙතැන් සිට, 30භාර්යාවන් ඇත්තන්, භාර්යාවන් නැත්තන් මෙන් ද, හඬන්නන් නොහඬන්නන් මෙන් ද, ප්‍රීති වන්නන් ප්‍රීති නොවන්නන් මෙන් ද, මිලයට ගන්නන් ගත් දෙයට අයිතියක් නැති අය මෙන් ද, 31මෙලොව සැපසම්පත් භුක්ති විඳින්නන්, ඒවායේ ම ඇලීගැලී නොසිටින්නන් මෙන් ද සිටිය යුතු යයි මම ඔබට කියමි. මන්ද, දැන් පවතින මේ ලෝකය පහ වී යන්නේ ය.
පිළිතුරු ගීය ගීතාවලිය 45:11-12, 14-15, 16-17
පිළිතුර-10 දියණියනි, මා වදනට සවන් දෙන්න; ඒවා සිතට ගන්න.
11එවිට නිරිඳු ඔබේ රූ සපුවට ප්‍රිය වනු ඇත;
ඔහු ඔබේ ස්වාමියා ය, ඔහුට අවනත වන්න.
12තීර්හි වැසියන් පඬුරු රැගෙන ඔබ වෙත එනු ඇත.
පිළිතුර-10 දියණියනි, මා වදනට සවන් දෙන්න; ඒවා සිතට ගන්න.
14මල්කම් හා ලියකම් කළ සළුවෙන් සැරසී, ඈ රජු වෙත එන්නී ය.
ඇගේ යෙහෙළියෝ ද රජු වෙත ගෙනෙනු ලබන්නෝ ය.
15සිත් සතොසින් ඇලළී ඔව්හු රජ මැදුරට පිවිසෙති.
පිළිතුර-10 දියණියනි, මා වදනට සවන් දෙන්න; ඒවා සිතට ගන්න.
16නිරිඳුනි, ඔබේ පිය රජුන් වෙනුවට, ඔබට පුත් කුමරුවෝ රැසක් ඇති වන්නෝ ය.
ඔබ ඔවුන් මුළු පොළොවෙහි මහීපාලයන් කරන්නෙහි ය.
17මම ඔබේ යසස, සියලු පරපුරට සිහි කරවන්නෙමි.
සව් සත සදා ඔබට පසස් ගී ගයන්නෝ ය.
පිළිතුර-10 දියණියනි, මා වදනට සවන් දෙන්න; ඒවා සිතට ගන්න.
ආලේලෙූයියා