꧁☆༒☬✟✟ 2022 සැප්තැම්බර් 2 ✟✟☬༒☆꧂

 

 පළමුවන කියවීම 1 කොරින්ති 4:1-5

1ඔබ අප ගැන සිතිය යුත්තේ, ක්‍රිස්තුන් වහන්සේගේ සේවකයන් ද දෙවියන් වහන්සේගේ අබිරහස් පිළිබඳ භාරකාරයන් ද හැටියට ය. 2භාරකාරයන්ගෙන් බලාපොරොත්තු වන්නේ ඔවුන් විශ්වාසවන්ත ව සිටී ම ය. 3එහෙත් ඔබ විසින් හෝ මනුෂ්‍ය අධිකරණයකින් හෝ මා විනිශ්චය කරනු ලැබීම, මා සලකන්නේ ඉතා සුළු දෙයක් ලෙස ය. තවද, මම මා ම විනිශ්චය කර නොගනිමි. 4මන්ද, මට විරුද්ධ ව කිසිවක් ඇති බව මම නොදනිමි. ඒ නිසා ම මම නිදොස් නොවෙමි. මා විනිශ්චය කරන්නේ සමිඳාණන් වහන්සේ ය. 5එබැවින් සමිඳාණන් වහන්සේ එන තුරු නියම කාලයට පෙර කිසි විනිශ්චයක් නොකරන්න. උන් වහන්සේ අඳුරෙහි සැඟවුණු දේ ආලෝකයට පමුණුවා, සිත් සතන්හි අදහස් හෙළි කරන සේක. එවිට හැම දෙනෙක් ම තම තමන්ට හිමි ප්‍රශංසාව දෙවියන් වහන්සේගෙන් ලබති.

  පිළිතුරු ගීය ගීතාවලිය 37:3-4, 5-6, 27-28, 39-40

    පිළිතුර-  39 හිමිතුමාණෝ දැහැමියන් ගළවන සේක. විපතේ දී ඔවුන්ට බලකොටුවක් වන සේක.

             3සමිඳාණන් වහන්සේ කෙරේ විශ්වාසය තබා යහපත කරන්න;

දේශයෙහි සුව සේ වෙසෙන්න.

4සමිඳුන් කෙරේ ප්‍රීතිමත් වන්න;

එතුමාණෝ ඔබේ මන දොළ ඉටු කරනු ඇත.

පිළිතුර-  39 හිමිතුමාණෝ දැහැමියන් ගළවන සේක. විපතේ දී ඔවුන්ට බලකොටුවක් වන සේක.

5ඔබේ ගමන් මඟ හිමිතුමාණන්ට භාර දෙන්න;

එතුමාණෝ කෙරේ විශ්වාසය තබන්න;

හිමිතුමාණන් හැම දෙය ඉටු කර දෙනු ඇත.

6හිමිතුමාණන් ඔබේ යහපත්කම ඉර එළිය මෙන් ද ඔබේ දැහැමිකම මද්දහන මෙන් ද බබළවන සේක.

පිළිතුර-  39 හිමිතුමාණෝ දැහැමියන් ගළවන සේක. විපතේ දී ඔවුන්ට බලකොටුවක් වන සේක.

27නපුර දුරු කොට යහපත කරන්න.

තිර කල් යෙහෙන් වැජඹෙනු ඇත.

28හිමිතුමාණෝ යුක්තියට ප්‍රිය මනාප ය;

සිය සැදැහැවතුන් අත් නොහරිති.

ඔව්හු සදහට ම රැකවරණය ලබති.

එහෙත්, දුදනන්ගේ පරපුර වැනසෙති.

පිළිතුර-  39 හිමිතුමාණෝ දැහැමියන් ගළවන සේක. විපතේ දී ඔවුන්ට බලකොටුවක් වන සේක.

39හිමිතුමාණෝ දැහැමියන් ගළවන සේක.

විපතේ දී ඔවුන්ට බලකොටුවක් වන සේක.

40හිමිතුමාණෝ ඔවුන්ට පිහිට වී ඔවුන් මුදන සේක.

සිය සරණ සොයා එන ඔවුන් එතුමාණෝ දුදනන්ගෙන් මුදා ලන සේක.

පිළිතුර-  39 හිමිතුමාණෝ දැහැමියන් ගළවන සේක. විපතේ දී ඔවුන්ට බලකොටුවක් වන සේක.

         ආලේලෙූයියා ජොහන්   8:12

         “ලෝකයේ ආලෝකය මම ය; මා අනුගමනය කරන්නා අඳුරෙහි නොහැසිර ජීවනයේ ආලෝකය ලබන්නේ ය”යි වදාළ සේක. 

       සුබාරංචිය ලූක්  5:33-39

   33එවිට ඔව්හු උන් වහන්සේට කතා කොට, “ජොහන්ගේ ගෝලයෝ නොයෙක් වර උපවාස පවත්වා යාච්ඤා පුද කරති; පරිසිවරුන්ගේ ගෝලයෝත් එසේ ම කරති. එහෙත් ඔබේ ශ්‍රාවකයෝ කමින් බොමින් සිටිති”යි කී හ. 34ජේසුස් වහන්සේ, පිළිතුරු දෙමින්, “මනාලයා මඟුල් ගෙදර සිටිය දී මනාල පිරිස උපවාසයෙහි යෙදවිය හැකි ද? 35එහෙත්, මනාලයා ඔවුන් කෙරෙන් වෙන් කරනු ලබන දවස එයි, ඒ දවසේ දී ඔවුන් උපවාස කරනු ඇතැ”යි වදාළ සේක.

36උන් වහන්සේ ඔවුන්ට මේ උපමාව ද වදාළ සේක: “කිසිවෙකු අලුත් ඇඳුමකින් රෙදිකඩක් ඉරා පරණ ඇඳුමකට අල්ලා මහන්නේ නැත. එසේ කළොත් අලුත් ඇඳුම ඉරී යනවා පමණක් නොව, අලුත් ඇඳුමෙ‍න් ගත් කෑල්ල පරණ ඇඳුමට කැපෙන්නේ ද නැත. 37කිසිවෙකු නව මිදියුස, පැරණි බඳුන්වලට වත් කරන්නේ නැත; වත් කළොත්, නව මිදියුසින් බඳුන් පැළී මිදියුස වැගිරී, බඳුනුත් නාස්ති වෙයි. 38නව මිදියුස වත් කළ යුත්තේ නව බඳුන්වල ම ය. 39තවද, පරණ මිදියුස පානය කළ කිසි මිනිසෙක් නව මිදියුස රුචි නොකරයි; පරණ මිදියුස ම රසය යි ඔහු කියන්නේ ය.”